Кыргыз Республикасынын Министрлер Кабинетине караштуу Жеке маалыматтарды коргоо боюнча мамлекеттик агенттиктин адистери 2025-жылдын 4–6-апрелинде Ысык-Көлдүн жээгинде өткөн «Киберкоопсуздук жана OSINT — Advanced Level» аттуу окуу воркшопуна катышты.
Иш-чара мамлекеттик органдардын, жеке сектордун, ошондой эле өлкөнүн санариптик жана каржы секторлорунун алдыңкы өкүлдөрүн бириктирди.
Воркшоптун жүрүшүндө заманбап киберкоркунучтарга каршы туруу, OSINT ыкмаларын үйрөнүү жана этикалык хакерлик көндүмдөрүн өнүктүрүү маселелерине өзгөчө көңүл бурулду.
Практикалык сессиялардын алкагында Агенттиктин адистери маалыматтык коопсуздук инциденттерин талдоонун актуалдуу ыкмалары менен таанышып, киберчабуулдардын сценарийлерин моделдөөгө катышышты. Бул багытта алынган билим жана тажрыйба Кыргыз Республикасынын жарандарынын жеке маалыматтарын коргоо деңгээлин жогорулатууга багытталган ишмердүүлүктө пайдаланылат.
Иш-чаранын уюштуруучусу — маалыматтык коопсуздук жаатында адистешкен жана өлкөдө санариптик сабаттуулук менен туруктуулукту жогорулатууга активдүү салым кошуп жаткан TSARKA Kyrgyzstan компаниясы.