Кыргыз Республикасынын Министрлер Кабинетине караштуу Жеке маалыматтарды коргоо боюнча мамлекеттик агенттикте 2024-жылдын 31-декабрындагы № 209 «Коррупцияга каршы аракеттенүү чөйрөсүндөгү Кыргыз Республикасынын айрым мыйзам актыларына өзгөртүүлөрдүкиргизүү жөнүндө» Кыргыз Республикасынын Мыйзамы менен таанышуу боюнча жумушчу кеңешме өттү.

Кеңешменин жүрүшүндө Мыйзамдык экспертиза жана укуктук камсыздоо бөлүмүнүн башкы инспектору А.Т. Таштанбекова киргизилген өзгөртүүлөр, атап айтканда, «Мамлекеттик жарандык кызмат жана муниципалдык кызмат жөнүндө» Мыйзамга киргизилген түзөтүүлөр тууралуу толук маалымат берди.

Негизги өзгөртүүлөр:

Атап айтканда, аталган мыйзамдын 12-беренеси мамлекеттик жана муниципалдык кызматка мамлекеттик жана муниципалдык кызматтын кызыкчылыктарына каршы коррупциялык же башка кылмыш жасагандыгы үчүн соттолгондугу бар адам соттуулугу өчүрүлгөн же алып салынганына карабастан кабыл алынбайт деген жобо менен толукталды.

Бул жаңылык мамлекеттик жана муниципалдык кызмат тутумундагы коррупцияга каршы чараларды күчөтүүгө, ошондой эле бул структуралардагы кызмат орундарына талапкерлерге болгон стандарттарды жана талаптарды жогорулатууга багытталган.

Талкуунун жүрүшүндө кеңешменин катышуучулары жаңы мыйзамдык жобону ишке ашыруунун практикалык аспектилерине, анын кадр саясатына жана мамлекеттик институттарга болгон ишенимдин жалпы деңгээлине тийгизүүчү мүмкүн болгон таасирине өзгөчө көңүл бурушту. Ошондой эле, кызматка кабыл алууда соттолгондугу жөнүндө маалыматты текшерүү механизмдерин өркүндөтүү боюнча сунуштар айтылды.